Traute Bohlen-Müller an ’t Vörleestelefoon

Allgemeen Kien Kommentar »

In de Tied van de 18. Januar bit to de 1. Februar 2016 leest Traute Bohlen-Müller ut Leer an ’t Vörleestelefon hör Vertellsel „Dröömauto“.

Traute Bohlen-Müller ut Leer schrifft plattdüütske Vertellsels un Gedichten. Hör Wark is al in verscheden Bladdjes, Bookjes, in de Diesel un in dat „Ostfreesland Magazin“ ofprentjet worden. Se is in d‘ Vörstand van de Arbeidskreis van oostfreeske Schrieverskes un Schrievers un Lidd in de „Schrieverkring Weser-Eems“. Up hör Lesungen begeistert se hör Publikum för Plattdüütsk.

De Bidrag van de plattdüütske Schrieverske is Dag un Nacht an’t Vörlesetelefon Oostfreesland unner de Nummer 04941/699944 to hören. Driest even anpingeln.

Neeijahrsscheten

Vertellsels Kien Kommentar »

Fritz freide sük al de hele Jahr up dat Neeijahrsscheten. He is sotoseggen de unbekroonde „König van de Füürwark“ in sien Straat. He versteiht daar wat van. Sien Nahbers fragen al siet Weeken, wat he dit Maal so vörhett. Man he will in Vörrut nix verraden. He hett up Tied in ’t Internet en paar heel grode Böller ut China bestellt. Dat sünd Dinger! Sowat hett in de heel Dörp gieneen! Sien Nahbers sölen wall kieken!

Fritz söcht sük een van de lüttjerde Raketen ut. De lett he um sess al even in sien Tuun hochgahn. Futt steiht sien Nahber Heini an d‘ Schütt. De kann dat ok nich mehr ofwachten. „Na, Fritz, geiht dat al los?“ „Nee, ik probeer blot een“, seggt Fritz. Mehr brukt he nich weten. Um acht Ühr word Fritz unrüstig. Man dat is to d’ Upbauen noch vöölsto fröh. He mutt sük noch bedaren.

Geerd, sien Söhn, hett sük för sien Vader noch wat Besünners utdocht. He will dat Wark mit en sülmstgebautde Kanonenslagg starten, as Intro, sotoseggen. Daar freid he sük nu al up. Daarför hett he en grode Stück Karbid un en bietje Water in en olle Melkbumme stoken. Dat sall futt an Anfang rechtschapen exploderen! Um twalm sall denn sien Vaders Füürwark mooi naananner ofbranden.

Tegen elven gahn de beiden na buten un bauen de hele Gedoh vör hör Huus up. Se willen up Tied klaar wesen. Man dat geiht gauer as Fritz docht hett. Se könen noch even weer rin gahn un en Grogg drinken to Upwarmen. Dat is naar kolt in buten.

As se gemütlich in d’ Köken sitten un de Upregen bold nich mehr uthollen könen, gifft dat buten en lude Knall. De Schieven in d’ Köken trillern. Se kieken heel verfeert un jagen as malle na buten. Oh, nee! Dat moje Füürwark brannt of. Nu al! Um vördel vör twalm! Fritz is heel dörnanner un will dat noch uphollen. Man Geerd ritt hum torügg. „Laat susen,Vader, hett gien Zweck mehr.“

Alle Nahbers komen nu rut un kieken mit grode Ogen na boven. Dat is en heel besünner Füürwark! Dat Ballern un Knallen hört gaar nich mehr up un du kannst komplete Figuren in all Klören an d‘ Hemel sehn. De Lüü stahn daar un röpen un freien sük. Dat gifft en gewaltige Applaus.

Blot Fritz steiht daar as en begoten Pudel unner sien egen Goldregen. „Mensch, Fritz, du büst ja fröh dran dit Maal“, röppt Heini. „Och, holl du di doch still“, denkt Fritz. He will sük nix anmarken laten, man he is leep düll.

Eerst as he in Huus gahn will, word he gewahr, wo dat Malöör geböhrt is. Heinis Enkelkinner hebben buten en Kinnerrakete anstoken. De is aver na de verkehrde Siet schoten, direkt unner de Karbidbumme. Do was nix mehr to hollen. Um twalm, as de Knaller vörbi is un se up dat Neje Jahr anstöten, geiht dat Scheten allerwegens eerst rechtschapen los. Dat is för Fritz un sien Nahbers nich mehr van Belang. Se sünd alle best tofree. Se hebben noch noit so en mooi Neeijahrsscheten in d’ olle Jahr beleevt as bi Fritz!

©Traute Bohlen-Müller

Stammtafel in d‘ Karsttied

Allgemeen Kien Kommentar »

Bit token Stammtafel an d‘ Maandagavend, de 14.12.2015, wull Dr. Dr. Heide Braukmüller uns en Vördrag over Wilhelmine Siefkes hollen. Spietelkerwies lett hör Gesundheid dat neet to. Se muss, so leed hör dat ok dee, ofseggen.

Man dat geiht up Wiehnachten daal. Wi hebben nu vöör, disse Avend in de Vörwiehnachtstied mit Wiehnachtsvertellsels, tosamen singen, wichteln, Tee un wat Leckers mitnanner to beleven. Elk sull en Wichtelgeschenk, de ruugweg 5 Euro weert is, mitbrengen. Mooi inpacken.

Daarmit wi weten, mit wovööl Lü wi reken könen, meld’t jo even bit Sönndag Avend an. Well noch wat besünners ut de Plattdüütske Welt to vertellen hett, kann dat geern doon.

Antje Olthoff an ’t Vörleestelefon

Vertellsels Kien Kommentar »

Noch bit to de 21. Dezember 2015 is de Text „De Lepellist“ van Antje Olthoff bi dat Vörleestelefon Oostfreesland to hören. De Text is in Septembermaant 2015 van hör för de OZ-Kolumne „Platt maakt“ schreven worden. Antje Olthoff stammt ut Leer-Loog. Se schrifft siet good 10 Jahr up Düütsk un Platt. In hör Warken experimenteert se geern mit Förm un Inhalt. Olthoff leevt un arbeidt nu up Nördernee.

Dat Vörleestelefon Oostfreesland is Dag un Nacht unner de Nummer 04941 / 69 99 44 (in ’t Auerker Nett sünner Vörwahl) to hören.

Bericht van d‘ September-Stammtafel

Allgemeen Kien Kommentar »

Bi de Plattdüütse Stammtafel an d‘ 14. September-Naant 2015 in’t Klottjehuus in Leer hett uns Ferdinant Reit, de 1. Vörsitter van de DLRG Ortsverband in Weener, uns en pläseerelk Vördrag över de Entstahn van de DLRG hollen. Wi wurrn gewahr, dat de DLRG in Düütsland 1912 up Rügen gründt wurr. De Seebäderkultur wurr utbautd un de Minsken mussen swemmen lehren. Gau was disse Idee över heel Düütsland verbrettd.

So kwemen allerwegens Unnerklottjes tostanne. Na d‘ Krieg ok een in Leer. Twee heel flietige Mannlüü moken en Uproop, dat se en DLRG-Klottje gründen wullen. Daarto hebben se sük in hör ingefaarvte Kriegsjoppen mit Prinz-Heinrich Mützen vör de Bahnhoff upstellt. Daar kwemen na en Tied genoog Lüü tosamen, de mitmaken wullen. Al kört daarna kunnen se vermelden, dat se „de embryonale Zuckungen des Aufbaus der DLRG überwunden“ harrn. (OZ)

In Leer gaff dat al en Swemmbad an de Georgsstraat. Daarum was dat licht, genoog Minsken, ok Kinner, in’t Water to kriegen. Daar wurrn ok futt Swemmesters utbildt. Man bold wurr dat nödig, ok Levensredders uttobilden. Dat wurr so organiseert, dat daar in elke Verein nahst een was, de dat Weten daarför ok wiedergeven kunn.

Wat is nu aver so besünners an de DLRG in Weener?

Herr Reit vertellde, dat se in Weener dotieds bloot in de Eems swemmen kunnen. Van Weener na Papenbörg of van Weener na Leer of annersum, je nadem, wo de Strömung nett leep. En heel Sett was dat all mooi, man irgendwennher wullen de Minsken ok maal en rechtschapen Bruus hebben un nich mehr unner en Tünne stahn, de vördem ok noch vullpumpt worden muss. In Bunde gaff dat wall al en Freebad, man de Weeneraners wullen en eegen Bad. So sünd se dat angahn un hebben in en körte Tied en Bad klaarkregen. Dat was heel wat Besünners. Se hebben futt en DLRG-Klottje gründt un en Jöögdesparte openmaakt.

De Kinner kunnen hör Seepferdchen maken, man wenn se daarmit klaar wassen, kwemen se nich weer, weil hör Ollern dochen, dat de Kinner nu swemmen kunnen. De Vörstand hett hen un her överleggt, wo se hör weer in dat Bad kriegen kunnen. Do hebben se en Wettkampf utfunnen. Un süh, de Kinner kwemen, um sük mit annern to meten un de Ollern kwemen, weil se an de Swemmsport van hör Kinner Spaaß harrn.

De Antahl van Leden wurrs stadig, un dat ok in anner Kuntreien. Se kunnen hör Freesweemer un Fahrten maken un trainieren. Na en Settje harrn se vööl gode Swemmers, de Priesen halen deen. Nu wassen de Weeneraners aver besünners clever. As se murken, dat de gode Swemmers oller wurrn un gien rechtschapen Nachwuchs nakweem, stürden se de Moders mit lüttje Kinner na Leer in dat Warmbad an de grote Steen. So kregen de lüttje Bödels al futt Spaaß an Hundjen in d‘ Water.

Daar hett sük en Generation ut entwickelt, de allerwegens grote Meisterschaften wunnen hett. Dat stunn maandags up Dübbelsieden in dat Rheiderland-Bladdje. Daar wassen vööl düütse Meisterschaften bi un een ut de Verein nahm sogaar an en spezielle Olympiade für ‚Nicht-olympische Disziplinen‘ in Lahti deel! De Vereinsheim steiht full van Pokalen. Se sünd darr to Recht heel stolt up. Herr Reit hett sülmst ok en heel Bült Priesen haalt. Daarbi seggt he, dat he ‚t anfangs gaar nich so mit Water harr. „Man mit vööl Fliet un Stöhn van alle Sieden kannst du en Bült vörnanner kriegen“, seggt he.

För dat Fördern van de Jöögde in de Swemmsport un sien Insatz in Weener hett he lesde Jahr de Bundesverdenstkrüz kregen.Un wenn ‚t all goodgeiht, will he anner Jahr sien Bahntje overgeven an de nahste Generation. Un denn mutt dat ok wiedergahn mit swemmen lehren. Noch alltied verdrinken tovööl Minsken unnödig.

Traute Bohlen-Müller©

Up Böskupp

Vertellsels Kien Kommentar »

„Gahst du even na Annemarie? Ik bruuk noch Backpulver.“, seggt Dinchens Moder.

Annemarie.

En Institution. Geen Inkoopcenter, geen Supermarkt, nee, Annemarie. Se hett en Kolonialwarenladen. Bi uns in’t Wieke. Van hör Vader arvt. De Jungste van dree Süsters. Bi hör inkopen is wat Besünners. Persönelke Bedehnen un Beraden, wenn nödig. Se hett alle Tied van de Welt. Se proot di mit Naam an.

„Dinchen, wat bruukt dien Ma?“ Wenn du dat unnerwegens al weer vergeten hest, kummt dat vör, dat Annemarie dat raden kann. Se fraggt, wat Ma vörhett. Backen. Un tosamen komen se dann up Backpulver.

Man dat is för Dinchen nich van Belang. Dat sünd de Boltjeglasen. De stahn vörn up de Thresen. Heel links. Bi de Kookjes. De Küssentjes, de Zuckerstangen, witt un rood striept, de Schokos un de Sahneboltjes.Wenn du Glück hest un daar sünd nett Neein ankomen, denn hett Annemarie de noch löss up de Trappen stahn un se grippt daar in un gifft di een röver, för unnerwegens, to Pröven, de maken de Weg na Huus so lecker sööt.

Froo Kampen is de‘ ok. Se hett vööl up hör Zedel. Annemarie mutt up Böön un Hüselband halen. Dann geiht se na achtern, daar hett se de insett Bohnen un Suurkohl un de Mettwursten.

Se proot mit Froo Kampen över hör Swegerdochter. Daar is güstern wat Lüttjes upstahn. En Wicht, söven Pund un all gesund un munter. In Ollbeek is vannacht well stürven. En heel olle Kunde. Noch ut hör Vader’s Tieden. Negentig is he worden. Noch lesde Week was he mit Rad bi hör. Tomaal umfallen. Wat en mooi Dood. Sünner Lieden.

Up disse Aard un Wies kriggt Dinchen dat to weten. Se kennt de Mann nich. Se fahrt heel glückelk mit en Boltje in Mund un Backpulver in Taske weer na Huus. Un daar hett se wat Neeis to vertellen.

Dat steiht mörgen eerst in’t Bladdje.

 

©Traute Bohlen-Müller

Septembermaant is Plattdüütskmaant

Allgemeen Kien Kommentar »

In d’ Plattdüütkmaant September sünd mennig Veranstaltens, waar uns moi Taal proot word.

An d’ 14. September um halv Acht laad’t ok de Plattdüütske Stammtafel Leer un umto to en Vöördrag up platt in. In’t Klottjehuus in Leer begröten wi Ferdinand Reit ut Weener. He vertellt uns wat van de DLRG.

An d’ 12. September, bi dat Fest van de Kulturen in Leer sünd wi ok weer daarbi. Wi hopen, dat an de Saterdag de Sünn schient, un wi mennig een van jo an uns Stand begröten könen. Ditmaal gifft dat wat Neeis bi uns (Swienkoppen, Pepernöten un Zuckertweebacken). Bi en Raadsel mutt man raden, wovööl bruun Bohnen dat Swien freten hett.

Elk, de dat Theaterstück over dat Leven van Wilhelmine Siefkes noch neet sehn hett, kann dit an verscheden Terminen noch nahalen.

Daarmit wi ruugweg weten, mit wovööl Lü wi bi de Vördrag van Ferdinand Reit reken könen, beden wi um en Anmelden bit Sönndag, de 13. September 2015.

Moi Gröten!

Urlaubstied

Allgemeen Kien Kommentar »

Leev Plattdüütskfrünn,

Wi hebben wall Urlaubstied, un vööl Lüü sünd unnerwegens. De Plattdüütske Stammtafel sall aver doch wesen. As alltied maandags um halv acht in Leer in’t Klottjehuus, Maandag, de 10. August.
Ditmaal hollt kieneen en Vördrag, ditmaal sall over dat proot worden, wat kummt un wat west hett.

1. Fest der Kulturen
2. Vördrag van Ferdinand Reit (DLRG) in d’ September
3. Losungen up Platt
4. Laway up Sömmertour un dat Theaterstück over dat Leven van Wilhelmine Siefkes
5. Septembermaant
6 .Klingende Krankenhuus in Weener Lesungen van Kinner
7 .Wat anners noch anliggt

Besünners dat Fest van de Kulturen mutten wi planen. Tosamenkomen mit de, de helpen willen.

Mooi Gröten!

Vörleestelefoon

Allgemeen Kien Kommentar »

In der Tied van de 26. Mai bit to de 8. Juni 2015 is uns Lidd Evert Druivenga ut Holthusen mit sien plattdüütske Vertellsel „Huusbau“ an ‘t Vörleestelefon Oostfreesland to hören. In sien Vertellsel geiht dat um de Huusbau van sien egen neei Huus in Weener, aver ok um de „Huusbau“ van en Vögelke.

Höört d’r man eeven rin!

Stammtafel Jannewaar un Tokumst

Allgemeen Kien Kommentar »

Moin, leev Plattdüütskfrünn,

wi hopen, dat ji all good in dat neei Jahr komen sünd. För dat Jahr 2015 wünsken wi dat Allerbeste, vör allem aver Gesundheid.
An d‘  tokomend Maandag, de 12. Jannewaar, is weer uns Stammtafelavend, as alltied in dat Klottjehuus, Neei Straat in Leer. Begünn is um halv Acht. Ditmaal will uns Dr. Johann Brinkmann wat over Utdrücken ut de Medizin in uns plattdüütske Taal vertellen. Daarto gifft dat Neiijahrskoken ( Rullerkes ) un Knedewafels. Villicht ok noch wat anners.

Wi söken ok alltied noch Sinnspröken up Platt. Ok Deren- Vogel- un Plantennamen worden noch söcht för dat digitaal Wordenbook, dat bold klaar is. Ok Raadsels kann elk mitbrengen.

Wi hebben ok al Planen för de Tokumst. In’t Feberwaar sall weer de Kohlkönigin of Kohlkönig küürt worden un för d‘ Määrt-Maant stahn wi mit en Müllermeister ut Grootfehn in Verbinnen. Over en Bokenflohmarkt willen wi ok weer proten.
Wi freien uns over elk, de kummt.

Moi Gröten un bit Maandag!


Wordpress Themes van Mobile Themes / Jim / Übersetzt ins Deutsche von Pascal Senn
Copyright © 2007 Platt in Leer. All Rechten bi uns / All rights reserved.