Vörjahr

Vertellsels 22 März, 2009

Nu kann `t weer losgahn, hett ok `n good Settje dürt!

Dat Weer löppt mit, smörgens word `t al ehrder lecht un mitunner bruukst du um halv negen kien Lücht mehr anknipsen, wenn du in `t Bladdje kieken wullt.

Nu man to! Na buten hen to tuuntjen! Waar hebb ik woll de neei Tuunschoh laten, de wi annerlesdens noch bi Aldi köfft hebben? Un Handsken, harren wi neet ok neei Tuunhandsken mitbrocht? De Best van all Ehefrauen mutt de Saken enerwaars henklackt hebben, waar kien Minske hör weerfinnt. Laat `t ruttern! Sall `k woll eerst de oll Dinger weer ruthalen mutten.

So, nu kann `t aver losgahn! Ik seh `t al – de Rasen sitt full Moos, man is ja noch völs to natt. De Platen up d` Tuunpadd un de Klinkers up d` Loon – all grön, mutt nödig wat an doon worden. Blot vandaag is `t `n bietje slecht, weil dat `n paar Daag moi Weer wesen mutt, um dat schoon to kriegen.

Wat is mit de Dobb? Sücht leep naar ut, laat mi daar man lever mit anfangen! Is aver noch `n bietje froh in d` Tied. Ik meen, de Poggen un anner Deren sünd seker noch neet d`rup verdocht, kregel to worden.

Nettgliek! Kunn ja ok mit Weden in d` Rabatten anfangen. Dat olle Kruuptüg un Queek wasst ja woll to elke Tied in d` Jahr! Haal `k mi maal de Kneeiküssen, denn geiht `t löss. Harr `k mi aver denken kunnt, de Grund is noch fix kold un heel un dall natt. Nee, so word d`r nix van, mit koll Hannen kann ik neet arbeiden.

Wo laat hebben wi dat egentlik? Och, du leve Tied, futt elf Ühr, Tied för `n Koppke Tee! Daarna geiht dat wiss löss in d` Tuun…

Hett denn `n Settje langer dürt mit de Teedrinkeree. Nahber Volli harr ok Teedöst un keek even rin. Tomaal was `t weer Middag un na `t Eten mutten wi uns henleggen, so bit dree, wi sünd in de Oller – eevkes rüsten!

Na `t Upstahn, bi d` Tee, keek ik kört na buten un sach, dat sük dat betrecken dee. Wenn dat futt Regen gaff, bruukde ik neet mehr mit Fröten in d` Tuun anfangen.

Mien Frau meende, ik sull noch even up Böskupp gahn, hör schoot in d`Sinn, dat se kien Botter för de Sönndaagskook in `t Huus harr. Kiek, so is dat, daar will man maal in d` Tuun wat rieten un – blot Tegenkrabben!

Wat sall `t! Mit `n Buddel Beer un `n lüttje Kruiden kunn de Dag villicht noch `n Gesicht kriegen. Of Volli woll noch maal inkickt? Frau wull ja doch noch Kook backen un – wennher kummt man weer so jung tosamen?

Van Hans Karwinski / Översett up Platt van Waltraut Theermann

2 Kommentaren bi dat Thema “Vörjahr”

  1. Reinhard Wodak, Leer sagt:

    Dat is so richtig ut leben grepen. Kunn mi net so gaun.
    ( Waltraut mußt eben översetten, wenn min platt mahl is )
    Ich schicke meine Frau immer im Regen in den Garten – wegen ihr Taint. Weiter so !!! Wo bleiben die nächsten storys von H.K. ?

  2. Ulla Springfeld, Leer sagt:

    heel mooi, Hans…………mook wieder so (ik kann neet allto best platt, aber….naja, hochdeutsch geht besser!!) Ich habs mir ausgedruckt und muß das ganz in Ruhe nochmal lesen. Platt ist einfach super!!
    Weiter so!!
    LG Ulla

Schriev en Kommentar


Wordpress Themes van Mobile Themes / Jim / Übersetzt ins Deutsche von Pascal Senn
Copyright © 2007 Platt in Leer. All Rechten bi uns / All rights reserved.