Maifier

Vertellsels Kien Kommentar »

De Maiboom was klaar. Vanavend sull he vör Riekens Huus upstellt worrn.

Tim un sien Koppel wassen daar al faker bi west, aver dit Jahr sullen se alleen de Wacht hollen. He un sien Fründ Arno wassen heel stolt. Se wullen mit hör sessteihn Jahren wall even wiesen, dat se Keerls wassen. Naseggen laten wullen se sük nix. Daarum sull de Boom good bewaakt worden. Dat wullen de beiden övernehmen. De anner Jungse sullen sük in de Naberdörpen up Luur leggen. Villicht harrn se ja Glück un kunnen noch en geklautde Boom daarbi stellen.

Tims Moder harr hum en Slaapsack henleggt un en paar Käsen Brüggen maakt. Se wuss, dat daar alltied vööl Kuur dörgung. De Jungse kregen seker nahst noch Smacht. Se harrn ofproot, dat elk wat to drinken mitbroch. Dat sull bi de annern wall Kruiden wesen. Mit so ’n Tünkram hull Tim sük al lang nich mehr up. He nahm twee Literbuddels Vodka mit. Daar harr he sük bi Tieden en Vörrat van besörgt. Wenn he in Stimmung komen un en Weekenende dörhollen wull, dann muss he vörglojen. De Vodka kunn nüms ruken. De eerste Malen was hum daar noch ördentlich slecht van west un eenmaal was he maandags nich to d’ Bedd ut komen. Do harr sien Vader hum torechtstuukt.

Lesde Jahr harr hum maal een in bi de Disko Tabletten anboden. Daarmit kunn he noch langer dörhollen. Un he harr alltied en besünner good Luun. Tim un sien Koppel wassen allerwegens as „Dördrievers“ bekennt. Waar se hen- kwemen was wat los!

Sien Mesterske harr doch maal wat murken. De kennde hum to good. „Hest du wat drunken?“ froog se hum na d’ Engelskstünne . He reet sük tosamen un see mit en Smüstern: „Nee, Froo Klemm, dat kummt hör blot so vör. Wiss nich!“ Un dann sach he to, dat he de Dreih kreeg. De Froo Klemm was egentlik heel up Stee. Aver wat Snaps un Roken angung, harr se en lüttje Macke. Se tellde dat al to „Drogen“. Dat funn he kleenelk. Aver villicht mussen Mesterskes so wesen.

Sien Ollern wassen daar vööl moderner. Bi hör in Huus kweem alltied genug Kuur up d’ Tafel, wenn fiert wurr. Un sien Ollern muchen geern fieren. Dat kennde he al van Kind of an so. Dat hörde de ja to! Siet sien Gebursdag dürs he nu ok Fründen na Huus inladen, wenn sien Ollern verreist wassen. De wassen nich so. Dat muss blot naderhand weer alls up Stee wesen. Sien Ollern verstunden hum.

As he um acht Ühr up sien Roller steeg, nahm he noch gau en Pille. Denn wurr he gaar nich eerst mööi. Inslapen kweem nich in Fraag! He wull ja nich sien Leven lang as Slockert gellen. Tegen negen wurr de Boom upstellt un ördentlich fiert. Um twalm sungen se „Der Mai ist gekommen“ un Tim full up, dat he dat Lied gaar nich up Platt kennen dee. De Handörgelspöler kunn sük heel nich van sien Treckbüdel trennen. He spölde all man to. Aver na ’n Settje, as nüms mehr singen wull un alle na Huus gungen, wassen se hum ok quiet.

Tim un Arno satten up en Beerkist tegen de Boom. Se wullen ofwesselnd en Hand dran hollen. Hör Kumpels moken sük up de Weg na de anner Dörpen. Se wassen neeisgierig, well as Eerste mit en neje Boom ankweem. Se harrn al maal een klaut. Dat was licht west, wieldat de Bewaakers slapen harrn as en Steen. Token Week harr dat in’t Bladdje stahn. Se wassen stolt west.

Arno gaff Tim de Beerbuddel. “Och nee”, see Tim „laat man. Ik will en klaar Kopp hollen.“ Arno muss ja nich weten, dat he al en Buddel van sien Vörrat up harr.

Arno froog, wo he dat mit de Blonde ut Loog harr. „Alls super!“, loog Tim. He wull hum vanavend heel wiss nich vertellen, dat Imke dat utmaakt harr. Se see klipp un klaar, dat se mit Jungse, de alltied en Dröhnen harrn, nix to doon hebben wull.

Eerst harr Tim de Welt nich mehr begrepen. Se was achter hum an west as en Pietske, man nu wull se tomaal nix mehr van hum weten. Anner Week kreeg he dat weer seker in d’ Rieg. So’n Wicht was ja wall maal van d’ Künne of. He drunk stilkens noch en Sluck ut sien tweede Buddel.

Tegen veer Ühr leggde Arno sük en Stündje hen to slapen. Tim see: „Ik bün noch fit genug, ik waak di up Tied up. „Dat du dat so dörhollen kannst, dat is ja nett as en Wunner. Hest vannamiddag up Ohr legen, wat?“ „Nee, ik hebb mi blot good in Greep.“

Tim satt nu allennig mit de Hand an de Boom. Dat was en mooi Nacht, aver en bietje kolt. He kroop in sien Slaapsack, sünner de Boom löstolaten. Dat was en tolle Geföhl. Nu harr he de hele Verantwoorden alleen. De annern sullen wall bold torüggkomen. He murk, dat de Pillen nich mehr wirken deen. Flink nahm he noch een un spölde de mit en Sluck Vodka na. Dat dee rechtschapen good. He was nu weer hellwaak, ok wenn he ’n raar Geföhl in d’ Kopp harr. Dat sull wall en Koomher geven, wenn de annern mit de tweede Boom kwemen. De wurr dann upstellt un Maandag stunn in’t Bladdje: „Dördrievers ut Heinitzfehn kunnen hör Maiboom verdedigen un ok noch een daarbisteken.“ Tim wuss nu al, wo good sük dat anföhlen dee. Waar bleven blot de annern ? Nu wurr ‚d aver Tied.

Arno wook as eerste up van de Spaasteek an hör Boom. As he hochkweem, sach he de annern mit hör geklautde Boom. „Mensch“, see Carsten, „ji olle Slaapmützen könt ja van Glück seggen, dat uns Boom noch steiht!“ Se bölkden un krakeelden noch un reten an Tims Slaapsack. Aver de rögde sük nich.

Maandags stunn in dat Bladdje: ‚Dood in d’ Slaapsaack. Sessteihnjahrige Schöler bi Maifier umkomen. De Polizei is noch an Upklaren. Frömdschuld sluten se eerstmaal ut.‘

©Traute Bohlen-Müller

Tulpomanie

Vertellsels Kien Kommentar »

Huuui! Huuuiii! En helle Kinnerlachen is achter d‘  Plaats to hören. Maaike un Ina spölen vandaag  Prinzessin, Tulpenprinzessin! Se smieten sük tosamen in de bunte Tulpengrafft, kruupen de weer ut un… weer rin!

Lesde Week hett Maaikes Vader de Doppe graven. Daar kwemen de Tulpenkoppen in. Elke Vörjahr worden de al vör de Ziepelarnt mit ’n besünner Maschien ofsneden.

Nu is dat weer so wied. De beide Wichter hebben al en paar Week dicke vöölklörige Tulpenstrußen an d’ Straat verköfft. Van dat sülmstverdeende Geld hebben Maaike un Ina sük elk en mooi neei Uhr in Bunde köfft. De Tulpentouristen komen van allerwegens na d’ Rheiderland. Se könen sük nich satt sehn an de Tulpenpracht up de früchtbaar Kleigrund.

De Ziepels mutten bold vörsichtig utgraven, sorteert un lange dröögt worden.

Naast, in Harvst komen ok noch de Froolüü ut dat Eemsland. De sitten denn in Riegen de heel Vörmiddag up d’  Deel un maken de Ziepels schoon för d’  Verkoop an de Genossenskupp in Weener.

Man nu is Spööltied. De Wichter laten sük immer weer rüggels of vörgels mit Gieren in de Tulpenblössems fallen! Hör Flechten un  Kleeden sünd full daarvan un se ruken beide as en komplete Parfümbuddel. „Maaike, du hest ja en lila Bladd  an dien Ohr!“, röppt Ina. Vandaag sünd se wiss de Tulpenprinzessinnen van Landschaftspolder!

Se könen ja nich weten, dat sük in de „Golden“ Jahrhunnnert haast bloot hollandse Prinzessinnen overhoopt een Tulpe leisten kunnen. 1593, kört naadem de Botaniker Carolus de Ziepels van Wien na Leiden mitbrocht harr, fung de „Tulpomanie“ ok al an. Daar wurrn stillweg neei un besünner Soorten tücht, mit Flammen an de Spitzen in heel mooi Klören. De wurrn na ’n Settje al hoch hannelt. De Overseehannel leep so good, dat de Priesen stadig anstegen. Bold harrn Tulpenziepels ’n Wert as vandaag Diamanten. De Hollanders dreven dat so wied, dat de Goldsmeden in Amsterdam lüttje Schattdösjes extra för enkelde

Ziepels an de Mann of Froo brengen kunnen. Mit Tulpenbiller wurrn ’n Bült Malers bekennt un 1633 wurr in Hoorn een heel Stadthuus för dree Tulpenziepels verköfft! Kinner wurrn snachts in de Tulpentuunen brocht to klauen. Tolesd gaff ’t sogaar Moord un Doodslagg.

Vööl Minsken sünd daar Tulpenmillionäre bi worden, man vööl ok Tulpenopfer, so as Rembrandt, de sien heel Profit in Ziepels anleggd harr. As 1637 de so benömde `Ziepelbörsenblaas` na en Auktion in Haarlem platzen dee,  besloot de Regeern, dat  Tulpenziepels weer as normaal Handelsware verköfft worden sullen.  So wurr na un na dat Tulpengeschäft ok weer normaal.

Un dat is good so, anners kunnen Maaike un Ina vandaag nich in Tulpenblössems baden.

De een, de hör Vader up sien Ackers plant, heet sogaar Maaike! De is heel dunkel lila mit fiengele Flammen.

©Traute Bohlen-Müller

Neeijahrsscheten

Vertellsels Kien Kommentar »

Fritz freide sük al de hele Jahr up dat Neeijahrsscheten. He is sotoseggen de unbekroonde „König van de Füürwark“ in sien Straat. He versteiht daar wat van. Sien Nahbers fragen al siet Weeken, wat he dit Maal so vörhett. Man he will in Vörrut nix verraden. He hett up Tied in ’t Internet en paar heel grode Böller ut China bestellt. Dat sünd Dinger! Sowat hett in de heel Dörp gieneen! Sien Nahbers sölen wall kieken!

Fritz söcht sük een van de lüttjerde Raketen ut. De lett he um sess al even in sien Tuun hochgahn. Futt steiht sien Nahber Heini an d‘ Schütt. De kann dat ok nich mehr ofwachten. „Na, Fritz, geiht dat al los?“ „Nee, ik probeer blot een“, seggt Fritz. Mehr brukt he nich weten. Um acht Ühr word Fritz unrüstig. Man dat is to d’ Upbauen noch vöölsto fröh. He mutt sük noch bedaren.

Geerd, sien Söhn, hett sük för sien Vader noch wat Besünners utdocht. He will dat Wark mit en sülmstgebautde Kanonenslagg starten, as Intro, sotoseggen. Daar freid he sük nu al up. Daarför hett he en grode Stück Karbid un en bietje Water in en olle Melkbumme stoken. Dat sall futt an Anfang rechtschapen exploderen! Um twalm sall denn sien Vaders Füürwark mooi naananner ofbranden.

Tegen elven gahn de beiden na buten un bauen de hele Gedoh vör hör Huus up. Se willen up Tied klaar wesen. Man dat geiht gauer as Fritz docht hett. Se könen noch even weer rin gahn un en Grogg drinken to Upwarmen. Dat is naar kolt in buten.

As se gemütlich in d’ Köken sitten un de Upregen bold nich mehr uthollen könen, gifft dat buten en lude Knall. De Schieven in d’ Köken trillern. Se kieken heel verfeert un jagen as malle na buten. Oh, nee! Dat moje Füürwark brannt of. Nu al! Um vördel vör twalm! Fritz is heel dörnanner un will dat noch uphollen. Man Geerd ritt hum torügg. „Laat susen,Vader, hett gien Zweck mehr.“

Alle Nahbers komen nu rut un kieken mit grode Ogen na boven. Dat is en heel besünner Füürwark! Dat Ballern un Knallen hört gaar nich mehr up un du kannst komplete Figuren in all Klören an d‘ Hemel sehn. De Lüü stahn daar un röpen un freien sük. Dat gifft en gewaltige Applaus.

Blot Fritz steiht daar as en begoten Pudel unner sien egen Goldregen. „Mensch, Fritz, du büst ja fröh dran dit Maal“, röppt Heini. „Och, holl du di doch still“, denkt Fritz. He will sük nix anmarken laten, man he is leep düll.

Eerst as he in Huus gahn will, word he gewahr, wo dat Malöör geböhrt is. Heinis Enkelkinner hebben buten en Kinnerrakete anstoken. De is aver na de verkehrde Siet schoten, direkt unner de Karbidbumme. Do was nix mehr to hollen. Um twalm, as de Knaller vörbi is un se up dat Neje Jahr anstöten, geiht dat Scheten allerwegens eerst rechtschapen los. Dat is för Fritz un sien Nahbers nich mehr van Belang. Se sünd alle best tofree. Se hebben noch noit so en mooi Neeijahrsscheten in d’ olle Jahr beleevt as bi Fritz!

©Traute Bohlen-Müller

Antje Olthoff an ’t Vörleestelefon

Vertellsels Kien Kommentar »

Noch bit to de 21. Dezember 2015 is de Text „De Lepellist“ van Antje Olthoff bi dat Vörleestelefon Oostfreesland to hören. De Text is in Septembermaant 2015 van hör för de OZ-Kolumne „Platt maakt“ schreven worden. Antje Olthoff stammt ut Leer-Loog. Se schrifft siet good 10 Jahr up Düütsk un Platt. In hör Warken experimenteert se geern mit Förm un Inhalt. Olthoff leevt un arbeidt nu up Nördernee.

Dat Vörleestelefon Oostfreesland is Dag un Nacht unner de Nummer 04941 / 69 99 44 (in ’t Auerker Nett sünner Vörwahl) to hören.

Up Böskupp

Vertellsels Kien Kommentar »

„Gahst du even na Annemarie? Ik bruuk noch Backpulver.“, seggt Dinchens Moder.

Annemarie.

En Institution. Geen Inkoopcenter, geen Supermarkt, nee, Annemarie. Se hett en Kolonialwarenladen. Bi uns in’t Wieke. Van hör Vader arvt. De Jungste van dree Süsters. Bi hör inkopen is wat Besünners. Persönelke Bedehnen un Beraden, wenn nödig. Se hett alle Tied van de Welt. Se proot di mit Naam an.

„Dinchen, wat bruukt dien Ma?“ Wenn du dat unnerwegens al weer vergeten hest, kummt dat vör, dat Annemarie dat raden kann. Se fraggt, wat Ma vörhett. Backen. Un tosamen komen se dann up Backpulver.

Man dat is för Dinchen nich van Belang. Dat sünd de Boltjeglasen. De stahn vörn up de Thresen. Heel links. Bi de Kookjes. De Küssentjes, de Zuckerstangen, witt un rood striept, de Schokos un de Sahneboltjes.Wenn du Glück hest un daar sünd nett Neein ankomen, denn hett Annemarie de noch löss up de Trappen stahn un se grippt daar in un gifft di een röver, för unnerwegens, to Pröven, de maken de Weg na Huus so lecker sööt.

Froo Kampen is de‘ ok. Se hett vööl up hör Zedel. Annemarie mutt up Böön un Hüselband halen. Dann geiht se na achtern, daar hett se de insett Bohnen un Suurkohl un de Mettwursten.

Se proot mit Froo Kampen över hör Swegerdochter. Daar is güstern wat Lüttjes upstahn. En Wicht, söven Pund un all gesund un munter. In Ollbeek is vannacht well stürven. En heel olle Kunde. Noch ut hör Vader’s Tieden. Negentig is he worden. Noch lesde Week was he mit Rad bi hör. Tomaal umfallen. Wat en mooi Dood. Sünner Lieden.

Up disse Aard un Wies kriggt Dinchen dat to weten. Se kennt de Mann nich. Se fahrt heel glückelk mit en Boltje in Mund un Backpulver in Taske weer na Huus. Un daar hett se wat Neeis to vertellen.

Dat steiht mörgen eerst in’t Bladdje.

 

©Traute Bohlen-Müller

SV Werder na Bin`m!

Vertellsels Kien Kommentar »

Mien Fründ wohnt al `n Sett in Bin`m. Naam laat `k maal weg, anners markt he noch, dat he meent is. Ji kennen hum, he is de, de bi d` Eemsbrüggbaueree `n Beerbuud un `n Grill upstellen wull.

Man he is ok Werder-Fan dör un dör, een van de heel Mallen. An sien hoog Flaggstock bi `t Huus sünd al Stück of wat Werder-Fahnen köttreten, man daar kummt alltied weer `n neei hen.

Wenn `t na hum gung, kunn de SV Werder driest maal to `n Spöl in Bin`m uplopen! Klaar is, dat he sük denn ok de Meit mook, sük um de Spölers to kümmern. Dat Eten kunn sien Frau woll best up d` Rieg brengen, man wenn `t Eten daan was, sull se ok man tosehn, dat se d` Dreih kreeg! Sull ja neet in d` Padd stahn, wenn `t vergnögelk wurr. Un watmaal kickt se ok so `n bietje suursnuutsk un wi weten ja, wo weekmodig de Spölerjungse sünd!

Se kunn sük man mit hör Jung `n anner Unnerdack söken, villicht daar, waar se arbeidt, is ja blot över `t Wekenenn! Eens is seker, de Bott in un um `t Huus mutt woll för de Fiereree blieven!

Un so stellt he sük dat all vör: Na d` Spöl up d` Bin`mger Feld, nettgliek tegen welke Mannskupp (kunn ok TUS Bunn wesen), gifft dat `n moje Festumtog dör de hele Dörp! Kinner mit Raden sölen vörweg fahren, upschiert mit grön – witte Falleratjes. Un all Mitlopers in Werder – Packje, dat versteiht sük van sülvst!

Achterna sall `t denn noch waar hengahn, `n bietje wat drinken. Man dat is in Bin`m neet so licht to finnen. De Lokaal an d` Butendiekskant, daar is neet an to denken, de maakt neet genoog her för disse Sellskupp!

Man up hum kannst an! Mit all Mann geiht dat up sien Huus daal, wiss wahr kunn dat woll de Werder – Fanclub – Zentraal wesen.

Gau noch even de neei Fahn anhoogtrecken, Grill ansmieten, Beer up d` Tafel un tüskenin noch `n paar Broden anbeden (maak maal hannig, Frau, un neet so sühnig mit Botter!). Nu geiht `t los!

Wenn `t Weer mitlöppt, kann `t ok buten in d` Tuun wiedergahn. Man in de lüttje Dopp dürt kieneen swemmen gahn, he weet ja neet, well `t kann un well neet!

Juchhei un Bliedskupp, Danz dör all Kamers, Bott is d`r genoog! Mit elv Spölers, Trainer, Umsörgers un Vörstand, dat kunn henkomen. Un de Leden van Werder -Fanclub neet vergeten, hören d`r ok hen. Un wo is dat mit Lü ut Politik un Wirtschaft? Man blot de Hiesigen, wi willen de Kark in `t  Dörp laten.

Van `t Dagbladd muss d`r ok noch en her of van `t Radio Oostfreesland…

Un de Unnerschriftensammelstünn – wo mutt he d`r mit an?

Mi dünkt, dat is neet mackelk, heel un dall Werder-Fan to wesen!!

@ Hans Karwinski, in’tPlatt brocht van W. Theermann

Simeleren över `t Oller

Vertellsels Kien Kommentar »

Wat nu? Harr ik güstern ok al so völ gries Spierkes up d’ Kopp? Kann ok van dat arige Lücht över d` Spegel komen. Disse Dag hett kien Kans up wat Besünners. Ok, waar ik anners leep `n Smeet an hebb, dat Lösen van `t grote Klaverveer-Raadsel in ´t Heft, kann mien Luun neet betern.

Bit hento vandaag hebb ik noch nix murken  van dat, waar de Lü seggen, dat kummt mit `t Oller. Ik hebb noch neet völ Krunkels un ok anners bün ik noch leep benig.

Man up anner Kant weet ik ok, dat man van fieftig of an sotoseggen up de Rulltrappen rüggels unnerwegens is. Un wenn dat nu so utsücht, dat dat bi mi ok lössgeiht mit Rusten un Rötten, will ´k mi so bi lüttjen man maal  Gedanken över ´t Oller maken.

Wenn Minsken in mien Oller heel gottlike Dag van Bewegen un gesund Eten proten, stahnt se na mien Dünken nettakraat vör disse Drüppel.

Willen Frünnen van mi lever na d` Sport gahn as mit mi hen Eten, segg ik faken tegen hör, se sullen sük `n Spegelplaat van Udo Jürgens kopen un noch `n Heizdeken bovendem.

Wenn `t eets geiht, eet ik geern un good, weet ok, wat ik will, so as Feldsalat un neet Eisbergsalat, ok neet Carbonara, lever Carpaccio. Man waarum kiek ik up Spieskaart in d` Wirtshuus jüst futt na dat, wat för ollere Lü anboden word??

Man stillkens much ik gaarkien jung Keerl mehr wesen! Kunn d`r doch wat van hebben, old to worden, ok wenn `t maal knippt un knappt.

Annerlesdens hebb ik hört van Lü, de hen un weer hör Bliedskupp daarin finnen, mit Rad dör d` Mongolei to susen, of mit `n Fallschirm ut `n funktionerende Fleger rutdwirreln – gifft all!  – Bruken doch Hülp, of neet?

Nett so, as de, de sük `n völ jungere Ollske söken of sük dat Gesicht plätten laten – de sünd wiss `n bietje slapp andreiht!

Nu mutt ik aver nödig utscheien mit de Schrieveree, mien Fingers doont al sehr. Kunn woll Gicht wesen, of??

Noch eens: Ik hebb leep `n Freid an kommodig Schoh – man daaröver simeleren wi `n anner Maal!!

Hans Karwinski
In Platt brocht van W. Theermann

So du neet mehr alls ofrecken kannst

Vertellsels Kien Kommentar »

Harr `k so ok neet docht – dat ik daar maal Last mit kreeg! Hebb `k doch bit hento vandaag alltied up Rieg brocht, was gaar kien Proot wert, was blot `n Bigahn!

Un wenn `t maal neet so leep as immer, was se ja ok noch daar – de best van all Ehefrauen! Man, ik geev `t to, waar se froher mit Bliedskupp rangung – hett nalaten!
Na un na mark ik, dat ik sülvst neet mehr manns genoog bün, Hand antoleggen. Dat verdrütt mi!

Kann dat woll wesen, dat de Arms mit Oller körter worden? Of… nee… mit mien lüttje Liev kann dat nix to doon hebben! Dat is nettso völ as gaar nix, sotoseggen hennig. Of un an hett mien Frau daar `n anner Menen van, man de proot ok `n Bült, wenn de Dag lang is.

Ik segg dat nu liekut: Ik bün up Pleeg anwesen – mit mien Foten. So, seggt is seggt!
Düvel noch maal – dat muss so komen. Anmellen. Hengahn.

Dat is mi mall to, hier to sitten. Is so `n Stohl as bi d` Kusendoktor. Daar ligg ik eerstmaal good up, man denn seh ik dat hele Reev, alls, wat ik ok in mien Warktügschapp hebb: Tangen, süksen un süksen, lüttje Mesten, Fielen, Raspen un `n Sliepmaschin mit Sliepstenen, waar to glieke Tied ok Water rutlöppt.Ik segg ja, nett as bi d` Kusendoktor.

Utbösseln? Noch is Tied! Daar kummt se – heel in witt! Se dürt sük woll sehn laten!

Geiht löss! Bietje frömd, fummelt doch een an mien Tönen rum, de `k neet kenn. Aver laat mi neet legen, so naar is `t nu ok weer neet. Se knippt mi all Nagels of, fielt, poleert un maakt ok de Eelt unner d` Foten weg. Killert blot `n heel bietje! Un – Keerl, du glövst dat neet – dat best kummt an Enn: Foten masseren. Ik segg di, daar word di warm um `t Hart un du denkst, is Sönndag!

As ik weer na Huus hen koom, steiht se al up Drüppel, de best van all Ehefrauen. Will weten, wo `t was. „Hunnert, `k hebb ok futt twee neei Tieden mitbrocht, harr aver mien Kalenner neet mit…“ „Maakt nix, kieken wi maal…“ Mitmaal hett se de Kauelkast bi d` Hannen un maakt för uns beid de nahste Visit bi d` Fotenupschierer klaar!

Nu hebb `k wat in Gang brocht!

Munter hollen – un griep drin!

@ HANS KARWINSKI

Nix as Tegenstöten

Vertellsels Kien Kommentar »

Dat gifft Dagen, daar löppt `t neet rund! So as annerlesdens…

Smörgens, as ik ut `t Bedd steeg, harr `k `t al in d` Puckel. „Womögelk scheev legen“, doch ik mi, „word seker nahst beter!“

To `t Frühstück gifft `t bi uns meest Tee, man disse Mörgen was Koffje an d` Rieg. Ik harr lesen, dat Koffje de Vergetelkkrankheid vörbugen kann. Na ´n Settje wull ik uns wat inschenken – man wat was dat? Hellbruun Schöttelwater, Koffje sach `n bietje anners ut! Dat Water was neet sachtjes dör de Filter mit dat Koffjemehl lopen, nee, nettakkraat d`ran vörbi tüsken Püüt un Filter. Neet upregen, weer neeis ansetten!

Tüskenin wull ik `t Bladdje ut d` Breevkast halen. Bleev dat Dingerees neet an d` Deckel hangen?  Vörderste Sied kunn `k do vergeten, stücken.

Mit mien Krüüz wurr `t ok neet beter, `n naar Pien. Of woll noch wat van de Salv in d` Schapp lagg, de verleden Maal so good hulpen hett? Fleitjepiepen, nix to finnen!

Eerstmaal `n Happke to Bieten un denn mit Rad na d`Aptheek, so good as dat even gung. „Salv vergrepen, man wi könen de woll besörgen bit hento vannamiddag“, kreeg ik to hören. Laat man sitten!

Tominsten bi de anner Aptheker in d` Loog gaff dat wat, wenn ok neet dat, wat ik egentlik wull. Weer vör d` Döör, hebb ik mi rein wunnert, dat mien Rad daar noch stunn –  bi so völ Tegenstöten.

Harr ik al vertellt, dat uns Auto in d` Inspektion was? Nett as ik weer to d` Döör inkwamm, pingelde dat Telefon. Warkstee was `t. Uns Auto bruukde `n neei Utpuffpott, daar gung kien Weg umto, so de Facklüü. Un de Kösten? `n lüttje gebruukde Auto kunn  neet vööl düürder wesen! Kunnst woll Treminen bi kriegen!

De Dag was noch neet hen. Wat later reep noch de Helperske van mien Doktor an. Se harren mi för vandaag in dree Weken bestellt, man de Unnersöken muss noch wieder um een Weke na achtern verschoven worden. Wat `n Apenspill! Un se see tolesd: „…`n mojen Dag noch!“

Wenn `t kummt, kummt `t in Bülten! Nu eerstmaal verpuusten!

„Ik kiek maal bi Volli in“, reep ik mien Frau to, de nett  Waske up Rackje hangen dee. Man so as `t komen muss – Volli was neet to Huus

@ Hans Karwinski
in Platt brocht van W. Theermann

Upbargen of Wegsmieten?

Vertellsels Een Kommentar »

Vör `n Settje was de Schösteenfeger bi uns un hett `t weer all schier maakt. Daarto muss he, so as elke Maal, ok up de Spitzböhn. As he sien Fegeree daan harr, kwamm he runner un see körtof: “Se mutten d`r mehr Acht up slaan, dat de Padd na d` Schösteen alltied freei blifft.”

Wat harr dat to bedüden? So vööl as ik wuss, stunnen boven blot `n paar Pappkartons mit Krimskraam rum. Ik  hannig hen – wull mi even sülvst `n Bild d`rvan maken.

Un – magst glöven of neet – de Böhn was heel un dall vullpackt!

Up de een Sied laggen `n Stück of wat van de holten Breden, de unner d` Kamerböhn sitten. Sotoseggen so `n Overblievsel, man weet noit, wennehr man de noch maal bruken kann. Is ja ok kien Stah in d` Padd! Man up de anner Sied – Harrijasses!

Blot maal so, um wat uptotellen van de Musematten: Wiehnachtstüüg, Paaskereev, oll Spööltüüg, versleten Plünnen, stofferg Kamer-, Köken- un Nachtschapplüchten, oflopen Sluren, Tapetenresten, `n Ovendpiep un wat neet all! In enig Kartons hebb ik gaar neet mehr rinkeken. Hulp nix! Hier muss nödig schier Lei maakt worden!

Do kwamm `t: „Wenn Du boven uprüümst, will ik d`rbi wesen!“

De Best van all Ehefrauen bood hör Hülp an! Man daar schuulde wat anners achter: Neet, dat irgendwat van dat Goodje ungesehn in d` Müll raakde!

Un so sull dat denn togahn: Se sull up d` Böhn gahn un ik wull mi up d` Ledder stellen. So kunn ik dat annehmen, wat se runnerlangde, `n Kedd maken.

De Rest is gau vertellt. Van boven runner kwammen uplesd blot enig köttreten Kartons un de een of anner Spinnweev. Un all Bedeln of Flutern hulp nix, dat leep neet mit! `n neei Plaan muss d`rher!

Enn van `t Lied was, wi hebben moje, grote Plastikkisten mit Decksel för all de Ditjes un Datjes besörgt. De hele Tüterkraam was ok binnen een Weke updeelt. Nu sücht uns Spitzböhn weer akkraat ut, de Schösteenfeger kann nu to elke Tied sien Wark doon.

De Best van all Ehefrauen harr `t woll `n Weke in d` Krüüz, was an düveleren, man is ja ok kien Stahhöchte daar boven. Blot, wenn `t na mi gahn weer…

Tominsten hebben wi nu ok noch Bott boven, wenn maal dat een of anner weer anfallt, wat burgen worden mutt! Villicht sull ik bitieden maal in d` Keller kieken?

Munter hollen un griep drin!

@ Hans Karwinski,
in Platt brocht van W. Theermann


Wordpress Themes van Mobile Themes / Jim / Übersetzt ins Deutsche von Pascal Senn
Copyright © 2007 Platt in Leer. All Rechten bi uns / All rights reserved.