Platt in Leer

An d’ 23 November kummen Leden van de plattdüütske Stammtavel und de Oostfreeske-Taal-Kuntreiversammeln in Leer weer tosamen. Un denn gift dat ok glieks weer heel wat Besünners to sehn un to lüstern. Hanne Klöver, de leep bekennt is van hör Wark as Schriverske un NDR-Moderatoorske, stellt de neje Plattdüüstk-Saterfreesk Fotoklenner för dat token Jahr vör. En Deel van dat Geld, wat een för de Klenner betahlt, word för de Stöön van Platt un Freesk bruukt.

In de Klenner gift dat mooi Biller ut Oostfreesland un umto. Daar stahnt denn Texten van Schriwers ut Oostfreesland un dat Saterland bi. En Koppel van de Autoren stellen hör Warken an de Avend in’t Leerder Klottjehuus ok vör. Natörelk köönt ok Minsken komen, de neet Leden van Oostfreeske Taal of de Stammtavel bünd.

Van kateer na söven (19.15 Ühr) köönt ji komen, de Lesen begünnt Stück of en half Stünn later.

Leve Leerder Plattdüütskfrünnen!

uns token Kuntreiversammeln is an d’ Dönnerdag , 23.06.2011 , 19.30 Ühr, in`t Klottjehuus in Leer.

Waar dat um geiht :

Jasmin Heinrichsdorff un Carl Ahlrichs stellen de “Tauschring Leer und Umgebung” vör.

Antje Olthoff ut Loog proot över plattdüütske Kinner- un Jugendliteratur.

Hans-Helmut Dirks, Oldersum, brengt sien Akkordeon mit un spölt Leder, de Friedrich Hoek in`t Plattdüütsk överdragen hett: “Sing up Platt, dat brengt di wat”.

Kummt d’r man all hen.

Mien Fründ wohnt al `n Sett in Bin`m. Naam laat `k maal weg, anners markt he noch, dat he meent is. Ji kennen hum, he is de, de bi d` Eemsbrüggbaueree `n Beerbuud un `n Grill upstellen wull.

Man he is ok Werder-Fan dör un dör, een van de heel Mallen. An sien hoog Flaggstock bi `t Huus sünd al Stück of wat Werder-Fahnen köttreten, man daar kummt alltied weer `n neei hen.

Wenn `t na hum gung, kunn de SV Werder driest maal to `n Spöl in Bin`m uplopen! Klaar is, dat he sük denn ok de Meit mook, sük um de Spölers to kümmern. Dat Eten kunn sien Frau woll best up d` Rieg brengen, man wenn `t Eten daan was, sull se ok man tosehn, dat se d` Dreih kreeg! Sull ja neet in d` Padd stahn, wenn `t vergnögelk wurr. Un watmaal kickt se ok so `n bietje suursnuutsk un wi weten ja, wo weekmodig de Spölerjungse sünd!

Se kunn sük man mit hör Jung `n anner Unnerdack söken, villicht daar, waar se arbeidt, is ja blot över `t Wekenenn! Eens is seker, de Bott in un um `t Huus mutt woll för de Fiereree blieven!

Un so stellt he sük dat all vör: Na d` Spöl up d` Bin`mger Feld, nettgliek tegen welke Mannskupp (kunn ok TUS Bunn wesen), gifft dat `n moje Festumtog dör de hele Dörp! Kinner mit Raden sölen vörweg fahren, upschiert mit grön – witte Falleratjes. Un all Mitlopers in Werder – Packje, dat versteiht sük van sülvst!

Achterna sall `t denn noch waar hengahn, `n bietje wat drinken. Man dat is in Bin`m neet so licht to finnen. De Lokaal an d` Butendiekskant, daar is neet an to denken, de maakt neet genoog her för disse Sellskupp!

Man up hum kannst an! Mit all Mann geiht dat up sien Huus daal, wiss wahr kunn dat woll de Werder – Fanclub – Zentraal wesen.

Gau noch even de neei Fahn anhoogtrecken, Grill ansmieten, Beer up d` Tafel un tüskenin noch `n paar Broden anbeden (maak maal hannig, Frau, un neet so sühnig mit Botter!). Nu geiht `t los!

Wenn `t Weer mitlöppt, kann `t ok buten in d` Tuun wiedergahn. Man in de lüttje Dopp dürt kieneen swemmen gahn, he weet ja neet, well `t kann un well neet!

Juchhei un Bliedskupp, Danz dör all Kamers, Bott is d`r genoog! Mit elv Spölers, Trainer, Umsörgers un Vörstand, dat kunn henkomen. Un de Leden van Werder -Fanclub neet vergeten, hören d`r ok hen. Un wo is dat mit Lü ut Politik un Wirtschaft? Man blot de Hiesigen, wi willen de Kark in `t  Dörp laten.

Van `t Dagbladd muss d`r ok noch en her of van `t Radio Oostfreesland…

Un de Unnerschriftensammelstünn – wo mutt he d`r mit an?

Mi dünkt, dat is neet mackelk, heel un dall Werder-Fan to wesen!!

@ Hans Karwinski, in’tPlatt brocht van W. Theermann

Bi’t Vörleestelefon Oostfreesland leest Traute Bohlen-Müller ut Leer van de 16. bit to de 29. Mai 2011 hör plattdüütsk Text „Omas 80-ste Gebursdag“.

Froo Bohlen-Müller schrifft plattdüütske Lyrik, Prosa un Leedtexten. Se is Lidd in de Arbeidskring oostfreeske Autorinnen un Autoren un in de Schrieverkring Weser-Eems. Texten van hör wurren al in Dagbladen, Tiedschrifften (Diesel, Oostfreesland-Magazin) un up Lesens bekennt maakt. 2010 is hör Vertellselbook „350 Jahr Stiekelkamperfehn un Neeifehn“ rutkomen.

Dat Vörleestelefon Oostfreesland is Dag un Nacht unner de Nummer 04941 / 69 99 44 (in ’t Auerker Nett sünner Vörwahl) to hören. Mehr Angaven over de Schrieverkring köönt ji finnen unner: www.arbeitskreis-ostfriesischer-autoren.de

Token Dönnerdag is de Kuntreiversammeln van d’ Vereen Oostfreeske Taal för Leer un umto. Nett as alltied geböhrt dat in’t Leerder Klottjehuus, Begünn is 19.30 Uhr.

To hören gift dat en Vördrag van de Student Jan Fasse ut Nortmoor. He vertellt vertellt wat over de Freeske Freedom in’t Middeloller. Achteran gift dat denn noch Dichten to hören. gerd Constapel ut Leer leest ut sien Lyrikband “Olldagsland”.

De Olthoff-Antje un de Schulte-Imke bünd ok dit Semester alweer bi de Leerder Volkshoogschool as Mesterskes togang. Twee Kursen over’t Platt bünd d’r in’t Anbodd: een over plattdüütske Kinner- und Junglüü-Boken, de anner over modeern plattdüütske Dichten un Leedjetexten.

Weest d’r man d’rbi, Lüü, dat is leep interessant.

An d’ 20. Märt-Maant – dat is en Sönndag – gift dat um Klock sess bi d’ Avend en moje Senden bi Radio Oostfreesland. Daar bünd de Musikkoppel Blau un de Schrieverske Antje Olthoff ut Loog in’t Studio up Visiet. Blau maakt plattdüütske Musik un Antje Olthoff schrifft up Platt. So hett sük dat tosamenfunnen, dat Blau een van Olthoffs Texten bruukt un daar en Leedje van maakt hett. Dat word vörstellt. Höört d’r man to, Lüü.

Wi wünsken jo all dat to dat Neeie Johr,wat ji jo so vöörstellen un riekelk Gesundheid un Bliedskup för all Daag. För de token Weken un Maanten hebben wi al en bietje wat plaant:

An d’ Middewwek, d 12. Januar, willen wi bi uns Stammtavel tosamen Sniertjebraa eten un Schrottwichteln. Man wat is  Schrottwichteln? Elk un een hett doch in’t Huus so en Stah in’t Padd of Stofffanger, de to good is, dat man hum wegsmitt. Aver so recht lieden mag hum ok kien een. Man för Annerseen is dat villicht “Künst”. Of nettakkraat dat Deel , wat man al alltied hebben wull. Dit deel packen ji in en Bladdje, daar en Bandje um un daarmit geiht dat dann up d’ Padd.
Disse Packjes worden denn Verknobelt, bit dat elk een Deel hett.Daarna geiht de Spaaß eerst recht löss. Waar treffen wi uns? In d’ Kulturspeicher. Uhrtied: 19.00 Ühr

An d’ Middeweek,  9. Februar,  willen wi bi uns Stammtavel Gröönkohleten un Wunnerpütenverknobeln.
Unköstenbidrag: 4 Euro, Melldt jo even an. Vöörher willen wi en Spazeergang döör de Ollstadt maken.

In d’ Määrt-Maant is weer Klottjeversammeln. Daar gift dat denn en Vöördrag over de Freeske Freeheid.
In de lesde Tied hett sük ruutstellt, dat an de Stammtafelavenden gode Anregens för de Klottjeavend binanner kwammen, daarum is dat nöderg,dat vööl Lü bi de Stammtafel sük ütern un sük daarover utlaten, wat villicht as Vöördrag, Besökens, Fahrten of annerswat all so mögelk is. För Ideen sünd wi alltied open un dankbaar, umdat wi dann blot noch de Idee umsetten mutten.

Al weer dat verkehrte Bladdje in d‘ Breevkasten

de Klingel geiht ok nich

Strunt liggt in ‘t Trappenhuus

noch en Barg Papier up d‘ Schrievdisk

de Pott mit Melk, de an ‘t Överkoken is

ik hebb mi Solt in de Tee daan

kien Kees mehr in d‘ Köhlschapp

de Botter al völs to old

buten vör ‘t Fenster ballert en Presslufthamer

dat is brannerg heet in mien Kamer

un ik denk an mien blöderg Hart,

dat daar in Hambörg up d‘ Trappen liggt

Mit dit Gedicht hett Antje Olthoff ut Loog jüst de daarde Pries wunnen bi de 10. Plattdüütske Literaturwettbewarv van dat Bladd Nordkurier in Neeibrambörg (Mecklenbörg-Vörpommern).

Wat nu? Harr ik güstern ok al so völ gries Spierkes up d’ Kopp? Kann ok van dat arige Lücht över d` Spegel komen. Disse Dag hett kien Kans up wat Besünners. Ok, waar ik anners leep `n Smeet an hebb, dat Lösen van `t grote Klaverveer-Raadsel in ´t Heft, kann mien Luun neet betern.

Bit hento vandaag hebb ik noch nix murken  van dat, waar de Lü seggen, dat kummt mit `t Oller. Ik hebb noch neet völ Krunkels un ok anners bün ik noch leep benig.

Man up anner Kant weet ik ok, dat man van fieftig of an sotoseggen up de Rulltrappen rüggels unnerwegens is. Un wenn dat nu so utsücht, dat dat bi mi ok lössgeiht mit Rusten un Rötten, will ´k mi so bi lüttjen man maal  Gedanken över ´t Oller maken.

Wenn Minsken in mien Oller heel gottlike Dag van Bewegen un gesund Eten proten, stahnt se na mien Dünken nettakraat vör disse Drüppel.

Willen Frünnen van mi lever na d` Sport gahn as mit mi hen Eten, segg ik faken tegen hör, se sullen sük `n Spegelplaat van Udo Jürgens kopen un noch `n Heizdeken bovendem.

Wenn `t eets geiht, eet ik geern un good, weet ok, wat ik will, so as Feldsalat un neet Eisbergsalat, ok neet Carbonara, lever Carpaccio. Man waarum kiek ik up Spieskaart in d` Wirtshuus jüst futt na dat, wat för ollere Lü anboden word??

Man stillkens much ik gaarkien jung Keerl mehr wesen! Kunn d`r doch wat van hebben, old to worden, ok wenn `t maal knippt un knappt.

Annerlesdens hebb ik hört van Lü, de hen un weer hör Bliedskupp daarin finnen, mit Rad dör d` Mongolei to susen, of mit `n Fallschirm ut `n funktionerende Fleger rutdwirreln – gifft all!  – Bruken doch Hülp, of neet?

Nett so, as de, de sük `n völ jungere Ollske söken of sük dat Gesicht plätten laten – de sünd wiss `n bietje slapp andreiht!

Nu mutt ik aver nödig utscheien mit de Schrieveree, mien Fingers doont al sehr. Kunn woll Gicht wesen, of??

Noch eens: Ik hebb leep `n Freid an kommodig Schoh – man daaröver simeleren wi `n anner Maal!!

Hans Karwinski
In Platt brocht van W. Theermann