Wiehnachtsfier van d‘ Stammtafel

Allgemeen Kien Kommentar »

To en kommodig Wiehnachtsfier bi Tee un Kook un later Glühwien laddt de Plattdüütske Stammtafel an d‘ 11. Dezember um halv Acht in’t Klottjehuus in Leer, Neei Straat, in. Wilma, Evert un Carl dragen plattdüütske Wiehnachtsvertellsels un Gedichten vör. Wi willen ok Wichteln, elk sull en lüttje Geschenk mitbrengen.

Over dit un dat, wat in de verleden Tied west hett un noch is (Keerlke-Pries, Verknobeln, Lüchterkark, Olljahrsdag) willen wi uns daarbi unnerhollen. Ok ditmaal, even bi Carl, Evert of Johann anmelden of ok ofmelden, wenn ji kein Tied hebben.

Achteihn in d‘ Baalje

Allgemeen Kien Kommentar »

Sünnerklaas kummt. Sünnerklaasavend heet aver ok Verknobelavend. Tosamen mit de Heimatvereen Leer veranstalt de Plattdüütske Stammtafel weer en Verknobelavend in’t Klottjehuus in Leer. Knobelt word um Aal, Schink, Torten, Kookjepaketen, Stollen, Stutenkeerls, Emmers mit Rullekes, Knedewafels un Anisknedewafels. Hexenhusen gifft dat ok weer

De Heimatvereen un de Plattdüütske Stammtafel laden jo to disse Knobelavend up oll Maneer in, Begünn is Klock sess. Meldt jo man driest bi Carl Ahlrichs, Evert Druivenga Johann Brinkmann an. Wi mutten dat Inkopen planen.

Stammtavel mit Robert Schulte

Allgemeen Kien Kommentar »

An d‘ Maandag, de 13. November, is weer uns Stammtavelavend. As alltied in‘t Klottjehuus in Leer in d‘ Neei Straat. Begünn is halv acht Ühr savends.

Wi hebben en besünner Gast. Robert Schulte leest ut sien Book un vertellt van sien Leven.
Dat Book heet: 38 Jahre über Verfallsdatum

Robert Schulte hett de Glasknakenkrankheid in de swarste Förm. De Dokters gaffen hum en Overlevenskans van, wenn‘ t umhoog kwam, een Jahr. He is nu 39 Jahr old. Bi Tee un Kookjes of Kook verwachten wi en wetensweert, körtwielig Vördrag.

Wi hopen up en vull besette Klottjehuus!

Stammtavel in d‘ Oktobermaant

Allgemeen Kien Kommentar »

An d‘ Maandag, de 9. Oktober, is weer uns Stammtafelavend. Ditmaal komen wi neet in‘t Klottjehuus tosamen, man in de Van-Rehden-Kamer achter‘t Klottjehuus. Dat begünnt as alltied um halv acht Ühr s’avends.

Wi willen proten over dat verleden „Fest der Kulturen“, dat Utlosen van de Raadsel, de Gaav van d‘ Stammtafel för en plattdüütske Bokenutwahl för‘ t „Krankenhuus Rheiderland“ in Weener, uns Aktion an‘d Reformationsdag bi de reformeerde Kark in Bunn, over dat Platt-Bladd, de Rheiderlanner Filmfrünn, de Plattdüütskmaant un allens, wat anners noch ansteiht.

Wi freien uns, wenn mennigeen kummt na Leer in d‘ Neei Straat.

Lesens in d‘ Plattdüütskmaant

Allgemeen Kien Kommentar »

Septembermaant is in Oostfreesland Plattdüütskmaant. Daar geböört denn dat een of anner, för groot Lüü un ok för de lütje Minsken. De Schrwieverske Traute Bohlen-Müller hett för all wat to beden. Dat gift in d‘ Septembermaant twee Lesens van hör in Leer, in de Stadtbibliothek.

An de 7. September, Klock veer, gift dat dat Programm „Binnerste buten“ – Smüstern bi Tee un Kook. In de plattdüütske Vertellsels un Gedichten geiht dat över alls, wat Minsken in hör Olldag beleven könen, pläseerelk un ernst. Intree is free.

För Kinner (so veer Jahr un oller) is dat plattdüütske Billerbookkino an d‘ 26. September, ok um Klock veer. Daat heet dat denn „En Puus up Stapp“. Traute Bohlen-Müller vertellt d’rbi, wat de Katt Mimi in hör eerste Jahr so utfrett un waarum se up Maal heel dörnanner is. Daar word denn ok en bietje bi klütert un tütert. Intree is daar ok free.

Wo sücht dat ut mit Pagels Tuun?

Allgemeen Kien Kommentar »

Bi uns Stammtavel an d’ 13. Märtmaand is Wilma Lüken to Gast. Se is Lidd bi de Frünnen van Pagels Tuun un se vertellt uns an disse Avend, wo dat upstünd mit Pagels Tuun bestellt is un wo dat in de Tokunft wiedergahn sall. Wi freien uns, wenn sük mennigeen an disse Avend (Klock halv acht) up de Padd na’t Klottjehuus in de Neei Straat maakt.

Vertellsels up Platt in Neeikamperfehn

Allgemeen Kien Kommentar »

De Schrieverske Traute Bohlen-Müller ut Leer is an d‘ 13. Januar in’t Oll Mesterhuus in Neeikamperfehn to Besöök. To de Veranstalten unner dat Thema „Dwars dör’t Jahr“ hett de Fehntjer Börgervereen inladen. Müller leest plattdüütske Geschichten ut hör Wark vör, daarto gift dat Musik. An’t Klaveer sitt Lenard Schumacher.

De Intree köst fiev Euro, dat Oll Mesterhuus is in de Schoolstraat 13 in Neeikamperfehn to finnen. Dat fangt um Klock acht an d‘ Avend an.

Achteihn in d’ Baalje!

Allgemeen Kien Kommentar »

De Plattdüütske Stammtavel Leer un umto, un de Heimatvereen Leer laden in to „Achteihn in d’ Baalje“, an d’ 5. Dezember 2016 um achteihn Ühr in dat Klottjehuus in Leer.

De Bruuk van ‘t Verknobeln, waar wi Oostfresen sovööl Pläseer an hebben, geiht torügg up en Hollandske Seefahrderbruuk. De Seelüü kregen an d’ Avend vör Sünnerklaas hör Hüür. De Hüür wurr to en groot Deel futt weer verspöölt.

In ‘t Klottjehuus word knobelt um:

Rökelt Aal, Pümmelwursten, Schink, Sniggentoort, Urstollen, Stutenkeerls, Marzipaantoort, Kookjepaketen, Emmers Knedewafels un Rullerkes. Dree Hexenhusen sölen ok noch baut worden.

Up en brekend vull Klottjehuus freien sük de Heimatvereen un de Plattdüütske Stammtafel.

Daarmit wi wat beter planen könen, even anmelden bi Carl, Evert of Johann.

„De groot Welt in Lüttjet“

Allgemeen Kien Kommentar »

Ditmaal kummt uns Inladen to de tokomend Stammtafelavend al froh genoog, daarmit elk  de Tied för en besünner Utstellen inplanen mag.

An d’ 14. November (dat is en Maandag), as alltied de twede Maandag in d’ Maant, sünd wi to Gast in de Evenbörg in Leer-Loog. Daar wisst Elise Andresen-Bunjes en besünner Utstellen:

„De groot Welt in Lüttjet“

In fief groot Rüümten sünd anto 50 Puppenstuven utstellt, van d’ Biedermeiertied over Historismus / Gründertied, Jugendstil, 20er Jahren, 30er Jahren, Art-Deco, 40er Jahren bit to de 50er/60er Jahren. Dat gifft neet blot Puppenkökens un Salons, ne, ok twee Puppenscholen (1900-1945), een oll Aptheek, een Hoodsalon, een Spööltüüg, een lüttje Laden van froher un een Cafe. In de lesde Rüümte gifft dat butendem een Puppenhuus, dat Kinner inrichten düren.

Elise Andresen-Bunjes föhrt uns dör de wunnerbaar Wereld van hör Puppenstuven.

Begünn van de Föhren is 19.15 Ühr un dat düürt ruugweg een un een halv Stünnen. Treffen willen wi uns tüsken 18.45 Ühr un 19 Ühr in de Ingangshall van de Evenbörg, de Intree köst 5 Euro. Umdat an disse Avend ok noch en Theatergrupp in de Evenbörg öven deit un dat still blieven mutt, word de Butendöör um 19.10 Ühr ofsloten.

Anmellen bi Carl, Evert of Johann.

Carl Ahlrichs an’t Vörleestelefon

Allgemeen Kien Kommentar »

Van d‘ 18. Juli bit to de 1. August is Carl Ahlrichs ut Leer mit sien Vertellsel „Fremd“ bi’t Vörleestelefon Oostfreesland. Dag un Nacht köönt ji hum denn unner de Nummer 04941/ 699944  hören.

Carl Ahlrich is 1951 in Weener in’t Rheiderland up de Wereld komen un is mit twee Talen upwussen. He hett uns plattdüüstk Stammtavel mit grünndt un ok al bi Radio Oostfreesland vööl up Platt maakt. Siet 2004 is he ok in de Schrieverkring. Höört d’r driest in!


Wordpress Themes van Mobile Themes / Jim / Übersetzt ins Deutsche von Pascal Senn
Copyright © 2007 Platt in Leer. All Rechten bi uns / All rights reserved.